Guðrún Ögmundsdóttir

Úr Wikipediu, frjálsa alfræðiritinu
Jump to navigation Jump to search
Guðrún Ögmundsdóttir (GÖg)
Fæðingardagur: 19. október 1950
Fæðingarstaður: Reykjavík
Dánardagur: 31. desember 2019
Flokkur: Merki Samfylkingarinnar Samfylkingin
Þingsetutímabil
1999-2003 í Rvk. fyrir Samfylk.
2003-2007 í RvkN. fyrir Samfylk.
= stjórnarsinni
Tenglar
Æviágrip á vef Alþingis

Guðrún Ögmundsdóttir (19. október 1950 - 31. desember 2019) var íslenskur félagsráðgjafi, borgarfulltrúi í Reykjavík og alþingismaður. Hún var kjörin á þing fyrir Samfylkinguna í Reykjavíkurkjördæmi árið 1999 og sat á þingi til ársins 2007.

Kjörforeldrar Guðrúnar voru hjónin Ögmundur Jónsson (1918-1971) vélstjóri og bifvélavirki og yfirverkstjóri hjá Vita- og hafnamálastofnun og Jóhanna J. Guðjónsdóttir (1918-1986). Móðir Guðrúnar var Hulda Valdimarsdóttir (1922-1981). Maður Guðrúnar var Gísli Arnór Víkingsson (f. 1956) sérfræðingur hjá Hafrannsóknarstofnun og eignuðust þau tvö börn.

Nám og störf[breyta | breyta frumkóða]

Guðrún lauk námi í félagsfræði og félagsráðgjöf frá Roskilde Universitetscenter í Danmörku árið 1983. Hún stundaði framhaldsnám í fjölmiðlafræði við sama skóla 1983-1985 og lauk þaðan cand.comm-prófi árið 1985.

Hún sinnti ýmsum störfum áður en hún hóf nám og starfaði m.a. á dagskrárdeild Ríkisútvarpsins, sviðsmaður í Þjóðleikhúsinu, var uppeldisfulltrúi við sérdeild Hlíðaskóla og starfaði á Greiningar- og ráðgjafastöð ríkisins. Að námi loknu var hún starfsmaður Sambands íslenskra námsmanna erlendis (SÍNE) 1985-1988, verkefnisstjóri hjá Lánasjóði íslenskra námsmanna, starfaði hjá Styrktarfélagi vangefinna, var framkvæmdastjóri námskeiða fyrir aðstandendur fatlaðra barna og félagsmálafulltrúi hjá Sjálfsbjörgu. Yfirfélagsráðgjafi á kvennadeild Landspítala 1988-1994 og stundakennari við læknadeild og félagsvísindadeild Háskóla Íslands um tíma. Hún var borgarfulltrúi í Reykjavík fyrir Kvennalistann frá 1992-1994 en var kjörin borgarfulltrúi fyrir Reykjavíkurlistann árið 1994 og var borgarfulltrúi til ársins 1998.[1] Hún starfaði sem deildarstjóri í félagsmálaráðuneytinu frá 1998-1999 eða þar til hún var kosin á þing fyrir Samfylkinguna í Reykjavík. Guðrún sat á þingi til ársins 2007.[2] Árið 2007 hóf hún störf sem sérfræðingur í menntamálaráðuneytinu og gegndi því starfi til ársins 2010 er hún var ráðin á vegum dómsmálaráðuneytisins sem tengiliður ríkisins og þeirra einstaklinga sem vistaðir höfðu verið á vistheimilum á vegum hins opinbera sem börn og unglingar og sætt þar harðræði.[3]

Guðrún sat í stjórn UNICEF á Íslandi á árunum 2011-2018 þar af frá 2016-2018 sem stjórnarformaður.[4]

Árið 2018 var Guðrún kosin í borgarstjórn fyrir Samfylkinguna. [5]

Annað[breyta | breyta frumkóða]

Halla Gunnarsdóttir skrifaði sögu Guðrúnar, Hjartað ræður för og kom hún út árið 2010.[6] Þann 17. júní 2019 var Guðrún sæmd riddarakrossi Hinnar íslensku fálkaorðu fyrir framlag í þágu mannúðar og jafnréttisbaráttu hinsegin fólks.[7]

Tilvísanir[breyta | breyta frumkóða]

  1. „Guðrún Ögmundsdóttir ekki í framboði“, Morgunblaðið, 23. október 1997 (skoðað 17. júní 2019)
  2. Alþingi, Æviágrip - Guðrún Ögmundsdóttir (skoðað 17. júní 2019)
  3. Visir.is, „Guðrún er tengiliður vegna vistheimila“, (skoðað 17. júní 2019)
  4. Unicef.is, - Minningarfrétt: Guðrún Ögmundardóttir (skoðað 2. janúar 2020)
  5. Reykjavik.is, „Borgarfulltrúar - Guðrún Ögmundsdóttir“ (skoðað 17. júní 2019)
  6. Forlagid.is, „Hjartað ræður för - Guðrún Ögmundsdóttir“, (skoðað 17. júní 2019)
  7. Visir.is, „Sextán hlutu fálkaorðuna á þjóðhátíðardaginn“ (skoðað 17. júní 2019)